zem schwarze Duume
Aggtuell
1. April 19: SD-Träffe. Kai Scherz!
Noon em letschte Duumeträffe im Dezämber 18 (mit Stadtfiehryg und feynem Znacht in dr SchuehmacherZunft)
hän mer das Johr noo dr Fasnacht s erschte Mool en Aaloss kha, wo unsere Hampe nimmy het kenne drbyy syy.
Mr hän en innere kurze Schwyygemynute aber in unserne Härz lo Dail näh.
S Thema vom Oobe isch die 'oblygaaty' Zeedel-Lääsede gsi.
Fir aimool het me nid uff d Schryybwyys (mit 4 Y - gäll Hampe!) gluegt, sondern het aifach zuegloost und dr Inhalt diskutiert. Clique-, Waage- und Gugge-Zeedel sin gnauso unter d Lupe gnoo worde, wie au die - wie ally Joohr vom André mitbrochty - Schnäggeposcht... Dass d Schnäggeposcht ainy vo de greeschte, no beschtehende Fasnachts-Zyttyge in dr Region isch, isch erwähnenswärt! Dass mittlerwyyle mit em André, em Walti und em Falterschnägg scho 3 Düümeler dert drbyy aggtyv sin, isch no erwähnenswärter.
Dr gsamty SD danggt de Schoofseggel fir d Gaschtfrindschaft und d Bewirtyg. Mr kemme gärn wider.
30. Jänner 19: S isch gschafft!
Hitte, im Verlauf vom friehnen Oobe, het dr Hampe derfe syny letschty Rais aaträtte.
Vyyly Johr het är synere beese Grangget die langy Naase zaigt und het s Lääbe in volle Ziig gnosse.
Syny lieby und gränzeloos härzligy Art sin bym "Düümeler der erschten Schtunde" genau esoo gärn gseh gsi, wie syny heerlige und mänggmool trääf-yroonysche Schprich!
Sy "ych wott jo nid krytysiere, ABER...." isch legendär worde... und mr hän e mänggen Oobe kenne giigele mit und ab ihm! Allewyl het är dr Gundsatz verdrätte 'konsequänt muesch syy!'.
Und gnau esoo het är reagiert, wo dr Sänsemaa an d Diire glopft het: Vier Dääg vorem Doot het är no gmaint:
"S isch Zyt jetzte! Und s isch guet esoo! Saisch aber bitte allne, dass es mr laid duet, eych ally im Schtich z looh!"
Dr Daag druff het är scho nimmy kenne reede, aber e Schoofseggel-Scheefli in Arm nä.
Noo kurze 48 Schtund schpeeter het är syyny (mit 3 Y) Rais (ohny Y) aadrätte! HEB S GUET HAMPE!
10. Septämber 18: SD-Träffe.
(Dr Schryybend het nid kenne drbyy syy, will är wägere brochene Schublaade nid het derfe reede)...
...aber es syg unhaimlig schpannend gsi. Dr Stefan het nämmlig e weeneli iber s Idiotikon referiert.
D Unterlaage, won är mitbrocht und verdailt het, sin grandioos interessant!
11. Auguscht 18: S Dootegässli.
Laider het s Dootegässli syt geschtert e ganz en aigeny neiy Bedyttyg! Dr Laiter vom Pharmaziemuseum het
derte, an sym Arbetsort, unsery Doo-syy-Wält verlosse.
Är isch zwar kai Dyymeler gsi, aber isch emmene Mängge vo uns rächt nooch gschtande.
Mr wänn ihm drum an dääre Schtell e liebe Gruess schigge uff sym Wäg in e bessery Wält.
25. Juni 18: Mundart-Rap als Kunscht
S isch e rächt groosse Huffe gsi, wo sich im Garte vom Schoofseggelkäller troffe het!
Fir aimool hän sich d Dyymeler nid mit alte Basler Dichter oder Fasnachts-Täggscht ussenandergsetzt,
sondern sin yyglaade gsi, e Bligg ind d Kunschtszene vom Mundartrap kenne z mache.
Dr bykannty Lokaalmatador in dr Rapperwält, dr "Rudee" (in dr Fasnachtswält-Botanik als 'wufus helgium lumpus tintus' beschribe) het mit Härzbluet uffzaigt, wie die neyery lyteraaryschy Dichtkunscht vo Basel z verschtooh isch.
S isch schpannend und heggscht interessant gsi!
E härzlig Danggerscheen an Rudee, fir syny Vorberaityge zu däm Oobe und syny kompetänte Ussfiehryge!
Als Zuegoob sin no Baseldytschy Gschichte vorglääse worde (merci Ursi!) .... und logysch sin au wider Schprich gmacht worde und s gmietlige Zämmesyy zelebriert worde....... s isch halt aifach e glatte Huffe!
12. März 18: Zeedellääsete
Einmal mehr fanden sich viele Düümeler (Mitglieder des 'schware Duume') im Schoofseggelkeller ein!
Für einmal stand nicht die 'korrekte Schreibweise' von Zeedeln im Vordergrund, sondern die Konsequenz in der Schreibweise!
Egal ob "ü" oder "y" ....ob "ö" oder "ee".... hauptsache konsequent!
Dabei wurde festgestellt, dass bei den Zeedeln - im Vergleich zu den Vorjahren - eine massive Steigerung der Qualität zu verzeichnen ist!
Ob da der slam-poetry-hype positive Wirkung zeigt???
Ob nun das 'alte' Baseldeutsch, die Hösch-Sprache oder gar eine geeignete Mischform "korrekt" sei, wird kurz andiskutiert. Fazit: Egal wie.....s kunnt guet und s Baseldysch het Zuekunft!
Dr schwarz Duume noo dr Fasnacht 2018???
aber Jo!
Wie allewyyl wärde mr e paar Zeedel gnauer unter d Lupe nää!
Inhalt - Schprooch - Schryybwyys und dr Gsamtuffdritt wird aagluegt.
Mechtysch Dy Zeedel au emol gryttysch betrachtet wisse, denn kumm doch au
an d Schittelschtrooss 4!
Dr schwarz Duume an dr Fasnacht???
aber JO!!!! Die maischte Düümeler sin WuFler oder zmindescht Frinde vo dr IG WuF.
Drum sin au ally vom schwarze Duume allewyl im IG WuF-Domizyyl härzlig willkomme!
Witt meeh drzue wisse? Denn gang doch aufach uff d HP vo dr IG WuF! (aifach dä Lingg aakligge!)
S isch am 11.12. gsi,
wo sich dr SD wider im Käller vo de Schoofseggel troffe het.
E schproochhyschtoorisch/hyschtoorysch schproochlige Wettbewärb rund um s Thema Wiehnachte in Basel het ys beschäftygt....
S isch aimool meeh, e schpannenden Oobe worde....
(Nur schad, hän sich fascht d Helfty vo allne Dyymeler d Zyt fir dä Oobe nid kenne yyrichte...)
Am 18. Septämber 2017 het sich wider e schtattligy Aazaahl vo Dyymeler an dr Schpittelschtroos 4 verrammlet....eh...vergammlet....eh versammlet, natyyrlig.
Laider simmr nid vollzäählyg gsi, will s e Hampfle Abmäldyge gäh het.
Aber - und das muess wäährli erwäähnt syy - : S het Ebber sogar an sym Burzeldaag dr Wääg zuen ys gfunde!
Wär saage mr nid.... singe aber uss voller Bruscht: "Zum Gyburzdaag vyyl Gligg, liebe Walti!"
Dä SD-Oobe isch fir aimool e weeneli anderscht gsi als allewyl: S het e Quiz gäh iber Schtoossenämme und Quartier-Bezaichnyge.... Ganz noonem Motto: Wär waiss denn au esoo Ebbys?.
Ych waiss nid, wär meeh Gschpass draa graa het... D Dyymeler oder ych bym Vorberaite... :-)
Dr Burzeldaagsabschluss im 4e Keenyg isch gmietlig gsi!
An däre Schtell none härzlig Danggerscheen de Gaschtgäber, de Schoofseggel.
(mjps)
Am 26.6.2017 wurde im im Höfli des Schoofseggelkällers eine sprachkulturelle Ansprache in dreierlei "Baaseldytsch" übesetzt.
Mit M&M (Markus und Marius) durften wir 2 Neumitglieder in der Runde begrüssen.
Etliche "Altgediente Düümeler" waren leider verhindert.
Bei Einzelnen mit grosser Klappe, klappte es mit den Klappstühlen nicht optimal.... "Es" klappte!!! (zusammen).
SR wird sich für Ersatz-Klappriges einsetzen!
Am 27.3.17 hän mr ys im Schoofseggelkäller droffe.
Mr hän grad 3 neiy Mitglider derfe begriesse....und ych glaub, s het allne gfalle.
Wie allewyl noo dr Fasnacht, isch d Zeedellääsede aagschtande...
Aber fir aimool nid "korrygierend", sondern noonem Aschpäggt vom "Basler Humor".
Dass drbyy aimool meh e huffe Zyt gfunde worden isch, zem Remynyszänzli und alty Bängg z verzelle, verschtooht sich von ellai...
Dr näggscht SD isch im Juno... und zwor am 26.ygschte wider am halby Achty....
Schwarze Duume und IG WuF an dr Fasnacht 2017:
Dass me dr SD und d IG WuF nid ganz trenne kha, liggt an de Lyt, wo drbyy sin...
Drum: Träffpunggt vor em Ändschtraich: Ab de 00.30 an dr Schpitalschtrooss 4... :-)
SD im Winter 2016:
Dr SD trifft sich im neiye Lokaal!
D Schpitaalschtroos 4, by de Schoofseggel, isch e würdyge Ersatz zum vormoolyge Buggel-Träff!
S isch gmietlig, und heerlig!
An dr nie gmachte GV vom SD, hämmer im 2016 beschlosse,
dass s Vorberaite vommenen Oobe im Turnus vo ebber anderem im SD ibernooh wärde sell.... Und s het beschtens klabbt.
Im 2016 het sich dr SD 3x troffe....
Mr hän Zeedel glääse, baaseldytschy Fable korrygiert....und zu verschiidene Täggscht unsere Sermon abgliiferet.... Und jeedesmool dr Plausch kha!!!
Schpeeteschtens wenn dr Hampe und dr mjps iber ihry "y" oder "i" gschtritte hänn, isch s Gaudi loosgange!
SD 7.12.15:
Am Schpaalebuggel het sich wider e schtattligy Hampfle Lyt droffe.
Byvor me aagfange het "schaffe", het me dyschpediert, wo in Zuekumpft d SD selle schtattfinde.
Unser Club-Lokaal am Buggel wird jo laider abem Friehjoohr 2016 nimmy zer Verfiegyg schtooh, will dr Babbe Schtaat em Gaschtgääber d Uffgoob derte gschtriche het.
Eb denne d "Schoofseggel" (intärn! *grins*) vo dr Basler Ritter-Kommende uns Gaschträcht gwäähre kenne, isch noonyg klar.... Sy wisse nämmlig no nyt vo ihrem Gligg.
Dr Schorsch het ys schpeeter e heerligy Uffgoob gäh: E Gedicht ibersetze....
S isch wie immer e heerlige Oobe gsi, womr in Harmonie und in dr Harmonie hänn ussklinge losse.
SD-Zuekumpft:
Me hets scho lenger gwisst....aber s ruggt als wie neecher!
Dr näggscht SD (im Dezämber) isch woohrschyynlig aine vo de letschte, wo me am Schpaalebärg wird kenne mache. D suchtinfo.ch wird s nimmy gääh...und drum au nimmy unser Club-Lokaal in dr Innerschtadt.
Nutze mr s aber no solangs no gooht! S wird sicher e Leesyg gfunde wärde!